مواد ليفل ٥ تخصص معلوماتية صحية بالجامعة السعودية الالكترونية

كيفكم مع الاجازة اللطيفة🤗
كثير طلبوا مني بتويتر اتكلم عن مواد ليفل ٥ تخصص معلوماتية صحية بالجامعة الالكترونية
راح اتكلم اليوم عن مواد الصحة بليفل ٥ وهي البوليسي والانتر والايديوكيشن ومادة اسلام٢ اما مواد الايتي الداتا بيس والاناليسيس راح اخليها بتدوينة ثانية..
اولا:
 راح اتكلم عن مادة البوليسي hcm113
هذي المادة بشكل عام تتكلم عن السياسات وخاصة السياسات الصحية والمجلس الاداري والتنظيمي والنظريات السياسية وعلاقة السياسة بالصحة والعوامل وغيرها المادة تعتبر متوسطة الصعوبة واذا كان مدرس المادة متمكن راح تكون سهلة جدااا،اخذت هذي المادة مع دكتور اسمه reddy  هندي الجنسية وكان جدا ممتاز والشرح رائع وسلس،فاذا شفت اسم الدكتور بالبانر سجل معاه المادة بدون تردد.
سبيلك للنجاح في هذي المادة هو حفظ وفهم الكي تيرمز وهي عبارة عن مصطلحات في بداية كل شابتر وفهم باقي الشابتر...بتكلم عن نفسي ذاكرت من الكتاب لكن اللي حاب يذاكر من السلايد فهي لاباس بها وفيها معلومات جيدة.
ثانيا:
مادةphc212 مادة سهلة ومادة رفع معدل تتكلم عن مفاهيم التثقيف الصحي وتعزيز الصحة وكم نظرية لتعديل السلوكيات ،سلايدات هذي المادة جدااا ممتازة وكافية تحتوي اغلب المنهج،مو كل المنهج😅 اغلب المنهج يعني لكن اللي حاب يدرس من الكتاب فهو سلس وسهل.سبيلك للنجاح في هذي المادة هو فقط متابعة نهاية كل شابتر او شابترين وتعتبر من المواد السهلة ومواضيعها سهلة ماراح تعاني منها باذن الله.

ثالثا:
مادةphc214 مادة الانتر وماادراك من الانتر😅كانت بالنسبة لي صعبة جدااااااا ومن اصعب مواد الصحة اللي مرت علي ،وعانيت منها كثير بسبب طولها فالشباتر طويلة والمواضيع متشابه ومتشابكة مع بعض،المرجع كان سيء بالنسبة لي صعب اكاديميا ومبهم ويتكلم عن امثلة كثير وتارك الشرح المفيد اطلاقا ماعجبني مرجع هذي المادة واتمنى يتم تغييره لمرجع افضل منه، المقرر يتكلم عن الفرق الصحية المشتركة وبعض المفاهيم ودور كل من الفريق والليدر واعضاء الفريق والكفاءات،سلايدات المادة هذي فخخ وغير كاملة اطلاقا لابد وارجع اقول لابد من الرجوع للمرجع.سبيلك للنجاح في هذي المادة المتااااااابعة الاسبوعية اوعى اوعى تراكمها عليك لابد تحترس من هذي المادة جيدا واي مصطلح ماتفهمه تسال دكتور المادة عنه ولابد تحط لك جدول عشان تدرس هذي المادة كويس وتستعد بشكل جيد للاختبار
وتدرس من المرجع وليس السلايدات،سلايدات المادة اذا ماغيروها فهي  ناقصة كثير وغير شاملة..ايضا انصحك تجمع اعمال السنة وتحرس حرس شديد تكون كاملة او شبه كاملة عشان لو قدر الله ماحليت كويس بالميد او الفاينل درجات اعمال السنة ترفعك عن الرسوب

رابعا:
اسلام ٢
مايحتاج نتكلم عنه مادة سهلة جدددددددا كله كلام نظري وبالعربي  وتعتبر من مواد رفع المعدل.

كذا خلصنا مواد الصحة ومادة اسلام ٢
باقي لنا مواد الاي تي وهي الداتا بيس والاناليسيس راح اتكلم عنه بتدوينة ثانية قريب باذن الله